QƏLƏBƏ SEVİNCİ YAŞADANLAR
Şəhid Əsədov Saleh Səməd oğlu
44 günlük Vətən müharibəsində Azərbaycan Silahlı Qüvvələrinin zabit və əsgərlərinin şücaətindən nə qədər yazsaq da, nə qədər filmlər çəksək də yenə də azdır.Bu döyüşlərdə Azərbaycan zabitlərinin,əsgərlərinin göstərdiyi qəhrəmanlıqlar dünyanı mat elədi.
Silahlı Qüvvələrimiz döyüşlərdə hərb tarixinə yenilik kimi düşən ən müasir silahlardan istifadəyə xüsusi önəm verdi. Bunun sayəsində ordumuz həm sürətlə irəlilədi, işğal altındakı ərazilərimizi işğalçı erməni qoşunlarından təmizlədi, həm də düşmənin bütün hərbi texnikasını, canlı qüvvəsini darmadağın etdi.
Beynəlxalq təşkilatların 28 il yarımda edə bilmədiklərini Azərbaycanın şanlı Ordusu Müzəffər Ali Baş Komandan cənab İlham Əliyevin rəhbərliyi ilə qısa müddətdə gerçəkləşdirdi. Ata-baba torpaqlarını erməni işğalçılarından azad etdi.
Silahlı Qüvvələrimizin döyüşçüləri əks-həmlə əməliyyatları zamanı müasir texnoloji silahlarla düşmənin komanda-idarəetmə məntəqələrini, raket və artilleriya qurğularını, döyüş texnikasını və təminatını sıradan çıxaraq onu iflic vəziyyətinə saldı. Qələbə sevincini xalqımıza yaşadan başda Ali Baş Komandanımız Müzəffər İlham Əliyev olmaqla, döyüş meydanında əsl qəhrəmanlıq, igidlik göstərən Azərbaycan əsgəri və onun cəsur komandirləri idi. Məhz bu qəhrəmanlarımızın rəşadəti nəticəsində iflic vəziyyətə düşən Ermənistan ordusu bütün köhnə və istismar müddəti bitmiş silah sistemlərini də döyüşə cəlb etdi və nəticəsi rüsvayçı şəkildə uduzdu. Azərbaycanın şanlı Ordusunun qarşısında tab gətirə bilməyən düşmən döyüş meydanında silah-sursatlarını qoyaraq qaçmağa məcbur oldular.Bununla da Silahlı Qüvvələrimiz “Ermənistan ordusunun məğlubedilməzliyi” mifini darmadağın etdi.
Xalqımız qələbə sevinci yaşadı. Silahlı Qüvvələrin Ali Baş Komandanı Müzəffər İlham Əliyevin rəhbərliyi ilə 2020-ci il sentyabrın 27-dən başlanan Vətən müharibəsi şanlı qələbə ilə sona çatdı, 44 gün davam edən hərbi əməliyyatlar çərçivəsində Azərbaycan Ordusu işğalçı Ermənistanın 28 il yarımda qurduğu silahlı qüvvələrini darmadağın edərək, böyük zəfərə imza atdı. Zəfər tariximizə imaz atan qəhrəmanlarımızdan biri də Beyləqan rayonunun Kəbirli kəndində dünyaya göz açan Şəhid Əsədov Saleh Səməd oğludur.
Əsədov Saleh Səməd oğlu 29 fevral 1984-cü il tarixdə Beyləqan rayonunun Kəbirli kəndində dünyaya göz açıb. O, 1991-ci ildə Beyləqan rayonu şəhid M.Fərzəliyev adına Kəbirli kənd tam orta məktəbində 1-ci sinifə gedib 2002-ci il tarixdə həmin məktəbi müvəffəqiyyətlə bitirib.
Orta məktəbi bitirdikdən sonra əsgərlik yaşı çatdığına görə ölkəmizin vətənpərvər övladları kimi o, da əsgəri xidmətə çağırılıb.
...Əsgərlik xidmətini Goranboy rayonunda “N” saylı hərbi hissədə edən Saleh öz nümunəvi davranışı, nizam- intizamı ilə də komandir heyətinin rəğbətini qazanmışdır. Hərbi xidməti bitdikdən sonra böyüyüb boya-başa çatdığı Kəbirli kəndinə qayıdıb. Əsgərlikdən qayıtdıqdan az sonra onda hərbi sahəyə olan maraq Salehi yenidən bu sahəyə qaytarır...
...Saleh yeddi qardaşdr. Salehin böyük qardaşı hərbiçi olduğu üçün onun da hərb sahəsinə böyük marağı olub. Bu marağı Salehdə böyük qardaşı Ələddin Əsədov yaratmışdı. Böyük qardaşı Ələddin Hərbi Akademiyanı bitirib “N” saylı hərbi hissədə zabit kimi xidmət edib. Murovdağ uçqununa düşüb. Ağır xəsarət alıb ordudan tərxis olub. 2016-cı ildə dünyasını dəyişib.Allah rəhmət eləsin.
Salehin kiçik qardaşı Nizami Səməd oğlu Əsədov da 44 günlük müharibədə döyüşüb.
...Saleh hərbi xidmətini başa vurduqdan qısa müddət sonra sənədlərini Müddətdən artıq həqiqi hərbi xidmət hərbi qulluqçularının (MAHHXHQ) hazırlığı kursuna verib. 20 oktyabr 2009-cu il tarixdə Silahlı Qüvvələrin Təlim və Tədris Mərkəzində Müddətdən artıq həqiqi hərbi xidmət hərbi qulluqçularının (MAHHXHQ) hazırlığı kursuna daxil olub, 09 yanvar 2010-cu il tarixdə 76mm-130 mm top komandirlik kursunu uğurla bitirib.
Kursu uğurla bitirərək Beyləqan rayonunda yerləşən “N” saylı hərbi hissədə top komandiri kimi xidmətə başlamış,sonradan Piyadanın Döyüş Maşınında (PDM-3) tuşlayıcı-operator vəzifəsində xidmət etmişdır.
Çavuş Əsədov Saleh Səməd oğlunun təltif olunduğu medallar:
-26 iyun 2013-cu il tarixdə Azərbaycan Respublikası Prezidentinin adından Azərbaycan Respublikası Müdafiə Nazirinin 0106t əmri ilə “Azərbaycan Respublikası Silahlı Qüvvələrinin 95 illiyi (1918-2013)” yubiley medalı ilə təltif olunub.
- 24 iyun 2019-cü il tarixdə Azərbaycan Respublikası Prezidentinin adından Azərbaycan Respublikası Müdafiə Nazirinin 076t əmri ilə “Azərbaycan Ordusunun 100 illiyi (1918-2018)” yubiley medalı ilə təltif olunub.
-26 iyun 2019-cu il tarixdə Azərbaycan Respublikası Prezidentinin adından Azərbaycan Respublikası Müdafiə Nazirinin 0159t əmri ilə “Qüsursuz xidmətə görə” 3-cü dərəcəli medalı ilə təltif olunub.
Vətən müharibəsində təltif olunduğu medallar (ölümündən sonra):
Qəhrəmanlıq göstərərək adını zəfər tariximizin şanlı səhifəsinə yazan çavuş Əsədov Saleh Səməd oğlu ölümündən sonra-iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti İlham Əliyevin Sərəncamları ilə ölümündən sonra -15 dekabr 2020-ci il tarixli Sərəncamı ilə “Vətən uğurunda ” , 24 dekabr 2020-ci il tarixli Sərəncamı ilə “Cəbrayılın azad olunmasına görə ” , 24 iyun 2021-ci il tarixli Sərəncamı ilə “Fizulinin azad olunmasına görə ” , 24 iyun 2021-ci il tarixli Sərəncamı ilə “İgidliyə görə ” medalları ilə təltif olunub.
Çavuş Əsədov Saleh Səməd oğlu hərbi hissədə xidmət etdiyi illər ərzində komandanlıq tərəfindən dəfələrlə fəxri fərmanlarla təltif edilib:
-2012-ci ilin yekunun əsasən döyüş və ictimai siyasi hazırlıqda əldə etdiyi nailiyyətlərə görə ,
-19 mart 2014-cü il tarixdə Novruz bayramı münasibətilə, döyüş və ictimai-siyasi hazırlıqda, nizam-intizamda yüksək nailiyyətlər əldə etdiyinə görə
-30 dekabr 2014-cü il tarixdə “31 Dekabr Dünya Azərbaycanlılarının Həmrəyliyi Günü” münasibəti ilə və 2014-cü tədris ilində döyüş və ictimai-siyasi hazırlıqda əldə etdiyi nailiyyətlərə görə ,
-26 iyun 2016-cı il tarixdə “26 iyun Silahlı Qüvvələr Günü” münasibətilə, döyüş və ictimai-siyasi hazırlığın yüksəldilməsində və hərbi intizamın möhkəmləndirilməsində əldə etdiyi nailiyyətlərə görə ,
- 01 feval 2017-ci il tarixdə Xidmət müddətində yüksək hərbi intizam nümayiş etdiyinə, döyüş və ictimai-siyasi hazırlıqda fərqləndiyinə görə , eləcə də “2 fevral Gənclər günü” münasibəti ilə təltif olunur.
...27 sentyabr 2020-ci il tarixdə Vətən müharibəsi başladı. Saleh bu müharibəyə top komandiri, eyn zamanda PDM-3-də tuşlayıcı-operator kimi başlayır. Saleh kamandirləri tərəfindən ona verilən əmr və tapşırıqları vaxtında və dəqiq yerinə yetirmişdir. PDM-3 də tuşlayıcı operator kimi həm də top komandiri kimi düşmənin mvqelərini sərras və dəqiq atışla məhv etmişdir.
2020-ci il oktyabr ayının 8-də Füzuli-Cəbrayıl istiqamətində qanlı döyüşlər gedirdi. Bu döyüşlərdə igidlik, qəhrəmanlıq göstərən Saleh və döyüşçü dostları bir neçə kənd və postları işğaldan azad edirlər.
Salehgil günortadan sonra döyüşdən istirahətə dönüblər. Saar 3-4 radələrində aşağıya düşəndə mənfur düşmən qadağan olunmuş silah olan kasetli bomba atır. Saleh döş qəfəsindən qəlpə yarası alaraq şəhidlik zirvəsinə ucalır.
Əsədov Saleh Səməd oğlu 2020-ci il oktyabr ayının 9-da Kəbirli kənd Şəhidlər xiyabanında dəfn olunmuşdur. Allah rəhmət eləsin.
Saleh şəhid olsa da səsi qalıb, gülüşü qalıb, sözləri qalıb vatsapda.
Adını bilmədiyim bir şair şəhid Əsədov Saleh Səməd oğluna bir şeir həsr edib. Şeiri həyəcansız oxumaq mümkün deyil. Şəhidimizə aid yazılan bu şeirə görə adını bilmədiyim şairmi, şairəmi çox sağ olun, deyirəm.
Dünya pəncərə dedilər,
Bir yol dönüb baxdım mən də.
Qanımla daşları yazdım,
Kimsə azmasın vətəndə.
Yolları yormadı izim,
Bir qəlbi qırmadı sözüm.
Ocağımda qaldı gözüm,
Vida etmədim gedəndə.
Səid,Səməd əmanətim,
Şəhadətdi son niyyətim.
Dastan olar cəsarətim,
Anlayarlar böyüyəndə.
Çağırsanız ad olaram,
Yanıxsanız od olaram.
Vallah, narahat olaram,
Sizlər ah-nalə edəndə.
Yurdum zirvə, mən çən oldum,
Müqəddəslərə tən oldum.
Vətən boyda VƏTƏN oldum,
Siz rahat gəzin sinəmdə.
Qanımla torpaq qazandım,
Yad eyləyin becərəndə...
Şəhidimizin həyat yoldaşı Əsədova Aytən Ağakərim qızı:
Mən, Əsədov Saleh Səməd oğlunun həyat yoldaşıyam. Ailə quranda Saleh hərbi xidmətdən, yəni əsgərliyə gedib gəmişdi. O, beş-altı il olardı ki, əsgərlikdən gəlmişdi. 29 oktyabr 2007-ci il tarixdə Salehlə ailə qurmuşuq.
2009-cu ildə top komandiri üzrə kursa getdi. Əvvəlcə kiçik çavuş idi. İşlədikcə çavuş oldu.
...Vətən müharibəsi başlamamışdan əvvəl müharibənin başlamasını bilirdisə də evdə bu barədə danışmırdı.
20 sentyabr 2020-ci il tarixdən evə gec-gec gəlməyə başlamışdı. Həmin ərəfədə insanlar elə bilirdi ki, müharibə olacaq. Amma bu barədə heç kim dəqiq bilmirdi ki, müharibə başlaya bilər.
Həmin ərəfədə evə gec gəlirdi. İki-üç il idi ki, hərbi hissədə sürücü işləyirdi. Piyadanın Döyüş Maşınının sürücüsü idi, həm də top komandiri idi. Müharibədə həm top komandiri olub, həm də sürücü. Döyüşə Füzuli istiqamətindən başlayıb. Cəbrayıla qədər döyüşüb. 08 oktyabr 2020-ci il tarixdə Cəbrayıl istiqamətdə gedən döyüşlərdə şəhidlik zirvəsinə ucalıb.
20 sentyabrdan sonra evə gec-gec gəlirdi. Soruşanda,deyirdi:
-Ora, irəli ayın-oyun daşıyıram. Nə daşıdığını deməzdi. Kənd arasında eşitdiyimi deyirdim ki, belə şeylər danışılır ki, müharibə başlayır. Hazırlıq gedir.
Deyirdi ki, fikir verməyin, danışırlar da.
Sürücü olduğuna görə həmişə yuxarı ayın-oyun aparardı.
26-sı sentyabr 2020-ci il tarixdə mənə zəng elədi:
- Mən gəlirəm Bolsuluya.(Beyləqan ərazisində kənd. red.) Ora mənə paltar göndər.Mən çıxıram. Bir neçə günlük gedəcəm. Paltarları qardaşım Şamildən göndərdim. Qardaşımın maşını var.
27 sentyabr 2020-ci il tarixdə müharibə başladı. Gündə bir dəfə, iki dəfə onun imkanı olanda zəng edərdi, danışardıq. Zəng edəndə də salamat olduğunu bilərdik. Bu bizə bəs edərdi ki, Saleh sağ-salamatdır. Mən özüm elə deyirdim ki, səsini eşidək ki, salamatçılıqdır.
Sonuncu dəfə Salehlə oktyabrın yeddisi axşam danışmışıq:
-Uşaqlarımızı soruşdu. Onda kəndimizin ərazisindən də atırdılar. Burada da səs-küy çox olurdu. Uşaqlar qorxurdu deyin onları soruşdu. Uşaqları Bakıya apartmışdı. Mən özüm evdə qalmışdım.
Salehin şəhid olma xəbərini əvvəlcə bilmədik. Dedilər ki, qaynın yaralanıb. 8 oktyabr saat üç-dörd radələri olardı.Dayım zəng elədi . Nizami də orada idi. Dedi ki, qaynın yaralanıb.Get bizə. Anam eşidər qorxar. Getdim ora. Orada dedilər ki, Salehin idarə etdiyi maşın aşıb. O birisi qaynım Bakıdaydı.Zəng elədi. Bilmirdi ki, mən bilmirəm. Dedi:
-Bacı, qorxma. Salehin maşını aşıbdı. Hamı yığışıb ora gedir. Heç nədən qorxma. Elə qolu sınıb.
Onda şübhələndim. Sonra qohumumuz var. O, gəldi. Bizi apardı Füzuliyə. Orada Salehi axtarırdıq. Tapa bilmirdik. Kimliyi üstündə olmadığı üçün tapmaqda çətinlik çəkirdik. Kimliyini çıxartmışmış. Onu qoyub getmişdi. Salehi qospitala dostu çatdırmışdı. Dostu deyib ki Əsədov Salehdi. Bir də dostuna son nəfəsində adını deyib-Əsədov Saleh.Dostu da tibb bacısına deyib-Əsədov Saleh. Ondan bildilər. ..
Kəndimizdə on yeddi şəhidimiz var. Saleh də o qardaşlarının yanında dəfn olunub.Onların hər biri ayrı-ayrılıqda qəhrəman idi. Kəndimizin seçilmiş oğulları,qəhrəmanları, igidləri idilər.
Saleh vətənpərvər olduğu qədər də ailəcanli, övladlarina həddən çox bağli idi.
Ata-anasından ötür ölürdü...
Saleh şəhid olanda otuz yeddi yaşı var idi.
Şəhid olandan sonra dörd medal veriblər . Canla-başla vuruşub.
Yazıçı-publisist Vidadi Hidayət:
-Şəhidlik ən uca zirvədir. Şəhid Peyğəmbərimizlə bir yerdədir. Məhəmməd Peyğəmbərlə (s.ə.s) bir yerdədir. Siz şəhidin həyat yoldaşısınız. Oğlunuz da Şəhid oğludur.Başınızı uca tutun.
Şəhidimizin iki övladı yadigar qalıbdır. Əsədov Səmıd Saleh oğlu 08 iyul 2008-ci ildə, Əsədzadə Səid Saleh oğlu 05 iyul 2011-ci ildə anadan olublar. Şəhidimizin övladları qəhrəman ataları ilə fəxr edirlər. İndi onların ən müqəddəs yeri Kəbirli kənd Şəhidlər xiyabanıdır.Burada ataları Saleh və Kəbirli kəndinin qəhrəman oğulları uyuyur.İndi bu məkan bütün Kəbirlilərin ziyarətgah yerinə çevirilib. Günün hansı vaxtında buraya gəlsən qəhrəman şəhidlərimizi ziyarət edənləri görmək olar. Allah şəhidlərimizə rəhmət eləsin.
Azərbaycanın şanlı Ordusu 44 günlük müharibədə tarixi Qələbə qazandı.
Bu qələbə sevincini yaşadanlara eşq olsun!