Azərbaycan daha bir idman növü üzrə dünya çempionatında ilk dəfə medal qazandı - FOTO

21:40 04-04-2021 383

Bu gün Misirin paytaxtı Qahirədə keçirilən qılıncoynatma üzrə yeniyetmə və gənclərin dünya birinciliyində ikinci yarış gününə yekun vurulub.

HerGun.Az xəbər verir ki, sablya üzrə milli komandamızın üzvü Zərifə Hüseynova ilk dəfə qatıldığı dünya birinciliyində yeniyetmələr arasında bürünc medal qazanıb.

Qrup mərhələsini dörd qələbə ilə başa vuran Zərifə 1/16 finalda Misir təmsilçisi Adel Eldokşun (15:8) ardınca özbəkistanlı sablyaçı Jasmina Abdullayevanı (15:11) məğlub edib. Yarımfinala yüksəlmək uğrunda keçirilən görüşdə Koreya Respublikası qılıncoynadanı Li Yunseo üzərində 15:6 hesablı inamlı qələbə qazanan Zərifə dünyanın ən güclü dörd yeniyetmə sablyaçı sırasına yüksəlməklə turnirin bürünc medalını təmin edib. Hüseynova finalın bir addımlığında dünya birinciliyinin qalibi ABŞ sablyaçısı Maqda Skarbonkieviçə 9:15 hesabı ilə uduzub.

Bu, Azərbaycanın qılıncoynatma tarixində sablya üzrə yeniyetmələrin dünya birinciliyində qazandığı ilk medaldır.

Xatırladaq ki, daha öncə şpaqaçımız Ruslan Həsənov 2019-cu ildə Polşanın Torun şəhərində keçirilən yeniyetmə və gənclərin dünya çempionatında bürünc medal qazanıb.