Qəza 20-dən çox evi təbii qazsız qoydu – FOTO/VİDEO
Lənkəran-Boradigah yolunun Separadi kəndindən keçən hissəsində yol qəzası baş verib.
HerGun.Az xəbər verir ki, Masallı sakini 27 yaşlı Elton Qafarov idarə etdiyi “Mercedes” markalı minik avtomobili ilə hərəkətdə olarkən idarəetməni itirib.
Nəticədə nəqliyyat vasitəsi əvvəlcə yol kənarındakı qaz borusuna, daha sonra ağaca çırpılıb.
Avtomobilin ön hissəsi ciddi zərər görüb.
Bu zaman nəqliyyat vasitəsində olan sərnişin Cavid İsayev orada sıxılmış vəziyyətdə qalıb.
Əraziyə Fövqəladə Hallar Nazirliyinin Cənub Regional Mərkəzinin əməkdaşları cəlb edilib. Briqada üzvləri Cavid İsayevi xilas ediblər.
O, Lənkəran Rayon Mərkəzi Xəstəxanasının Travmatologiya şöbəsinə yerləşdirilib. Qəza nəticəsində qaz xətti zədələndiyindən, yaxınlıqda yerləşən 20-ə yaxın evə təbii qazın verilişi dayandırılıb.
Eyni zamanda, hadisə baş verən Lənkəran-Boradigah yolunda avtomobillərin hərəkəti bir saata qədər məhdudlaşdırılıb. Faktla bağlı araşdırma aparılır.
Rövşən Əzimov
