İƏT müşahidəçisi: “Məntəqələrdə heç bir qanun pozuntusu müşahidə etmədik”
Azərbaycanda fevralın 9-da keçirilən parlament seçkiləri demokratik keçib.
Trend-in məlumatına görə, Milli Məclisə fevralın 9-da keçirilən növbədənkənar seçkilərin nəticələri ilə əlaqədar təşkil olunan tədbirdə beynəlxalq müşahidəçi, İslam Əməkdaşlıq Təşkilatının müşahidə missiyasının üzvü Əli Əsgər Mohammadi deyib.
Azərbaycan tarixində demokratiyanın mühüm amil olduğunu deyən müşahidəçi Azərbaycan xalqını seçkinin nəticəsinə görə təbrik edib.
O əlavə edib ki, İslam Əməkdaşlıq Təşkilatının iki müşahidəçisi seçkilərə müşahidəçi qismində qatılıb. Onlar Bakıda səkkiz məntəqədə müşahidə aparıblar.
Məntəqələrdə heç bir qanun pozuntusu müşahidə etmədiklərini deyən Əli Əsgər Mohammadinin sözlərinə görə, havanın soyuq olmasına baxmayaraq, parlament seçkilərində seçici fəallığı yüksək olub.
O, seçkidə müşahidəçilərin prosesi diqqətlə izləməsindən də məmnun qaldığını söyləyib.
Əli Əsgər Mohammadi bunu da əlavə edib ki, Azərbaycan təşkilatın fəal üzvüdür:
“Azərbaycan bizim üçün dost, qardaş ölkədir. Bizim səsimiz sizinlədir. İslam Əməkdaşlıq Təşkilatı Azərbaycanın haqq işini hər zaman dəstəkləyir”.
