Şişirdilmiş dodağının partlaması qadını kor edəcəkdi - FOTO
Böyük Britaniyanın Stokport şəhərinin sakini, 25 yaşlı kosmetoloq Cessika Mayotun təbii gel ilə şişirdilmiş dodağının partlaması onu görmə qabiliyyətindən məhrum edəcəkdi.
“The Mirror” xəbər verir ki, dodaqlarını şişirtmək istəyən qadın klinikaya müraciət edib.
Orada onun dodaqlarına inyeksiya vasitəsilə üç millimetr həcmində təbii gel vurulub. Bu əməliyyata görə, qadın 450 funt sterlinq (təxminən 995 AZN - red.) ödəyib.
Lakin əməliyyatdan bir gün sonra qadının dodaqları şişərək ağrımağa başlayıb.
Qadın əməliyyatı həyata keçirən mütəxəssisə müraciət etsə də, həkim onu qəbul edə bilməyəcəyini bildirib.
Cessika digər həkimlərə müraciət etsə də, yaranan problemləri tibb işçiləri aradan qaldıra bilməyib.
Nəticədə məlum olub ki, qadının dodaqlarına infeksiya düşüb. Ona bir kurs antibiotik müalicəsi yazılsa da, Cessikanın tənəffüs sistemində problemlər ortaya çıxıb.
Bir müddət sonra qadının dodaqları çürüməyə başlayıb və sonda partlayıb. Partlama zamanı dodaqlarda yığılan çirk qadının gözünə sıçrayıb. İnfeksiyaya məruz qalan göz görmə qabiliyyətini itirməyə başlayıb.
Ancaq ciddi tibbi tədbirlər sayəsində qadının gözündə inkişaf edən infeskiyanın qarşısını almaq mümkün olub.
