Rusiyada azərbaycanlı sevgilisi ilə əlbir olub həmyerlisini öldürdü
Rusiyanın Cənubi Saxalinsk şəhərində yanan mənzildən 55 yaşlı Azərbaycan vətəndaşının cəsədi tapılıb.
Ekspertlər sonradan müəyyən ediblər ki, onun ölümünə səbəb qapalı kəllə-beyin travması olub.
Cinayət işinə başlayan müstəntiqlər tezliklə müəyyən ediblər ki, azərbaycanlının ölümündə onun tanışları günahkardır.
Belə ki, iki kişi və bir qadın mənzil kirayəyə götürüblər. Öz aralarında razılığa gəliblər ki, kirayə haqqını bərabər şəkildə ödəyəcəklər. Lakin cəsədi tapılmış şəxsin pulu olmadığı üçün kirayə haqqını ödəməyib.
Məlum olub ki, martın 29-da 55 yaşlı azərbaycanlı qonşu qadınla birlikdə spirtli içki qəbul edir. Alkoqolun təsiri altında onlar yenidən ödəniş məsələsini müzakirə etməyə başlayır və dalaşırlar. 37 yaşlı qadın münaqişə zamanı kişini vurub, sonra isə lövhəni onun başına çırpıb.
Davaya qadının rəfiqəsi olan 43 yaşlı azərbaycanlı miqrant da qoşulub və həmyerlisini yumruqlayıb. Səhəri gün onlar döydükləri şəxsi ölü vəziyyətdə görüblər. Cinayəti gizlətmək üçün cəsədi yandıraraq qaçıblar.
Müstəntiqlər cinayət işini məhkəməyə göndəriblər.
