“Meyvəli” bazarında kütləvi zəhərlənmə - Yumurta yeyənlər xəstəxanalıq oldu
“Meyvəli” meyvə və tərəvəzlərin topdan və pərakəndə satış bazarında kütləvi zəhərlənmə olub.
HerGun.Az xəbər verir ki, hadisə səhər saatlarında baş verib.
Səhiyyə Nazirliyindən saytımıza verilən məlumata görə, təcili yardıma ilk çağırış saat 10:14 daxil olub.
Ünvana yollanan həkimlər bir nəfəri zəhərlənmə diaqnozu ilə Kliniki Tibbi Mərkəzə (KTM) aparıblar.
Saat 10:52 də ikinci çağırış daxil olub. Daha 3 nəfərin halının pisləşdiyi bildirilib.
Sözügedən şəxslər də KTM-in yolxucu xəstəliklər şöbəsinə yerləşdirilib.
Tibbi yardım göstərilərkən zərərçəkmişlər yumurta yedikdən sonra özlərini pis hiss etdiklərini bildiriblər.
Kliniki Tibbi Mərkəzdən verilən məlumata görə, hazırda xəstəxanaya çatdırılan şəxslərə lazımi yardımlar edilir. Vəziyyətləri orta ağırdır.
