“Qarabağ”ın kapitanı Premyer Liqanın bir klubunda ən çox oyun keçirən futbolçudur

12:00 17-08-2020 487

Azərbaycan çempionatlarında eyni klubda ən çox oyun keçirən futbolçu Maksim Medvedevdir.

HerGun.Az xəbər verir ki, o, “Qarabağ”ın heyətində 285 dəfə Premyer Liqa matçına çıxıb.

Onun sabiq komanda yoldaşı Aslan Kərimov Ağdam təmsilçisində 268 görüşdə iştirak edib.

İlk “üçlüy”ü “Xəzər Lənkəran”da 254 oyunda forma geyinən Rahid Əmirquliyev qapayır. Lakin Maksimdən fərqli olaraq, onun hər iki izləyicisi ayrı-ayrı illərdə digər klublarda da oynamağa imkan tapıb.

Bir komandada ən çox oyun keçirən 10 futbolçunun siyahısında “Qarabağ”ın futbolçuları çoxluq təşkil edir. Ağdamlıların altı oyunçusu bu siyahıya düşüb. “Turan”da iki, “Viləş”lə “Xəzər Lənkəran”da bir futbolçu fərqlənib.

İlk “onluq”da yeganə legioner Ansi Aqollidir. “Qarabağ”ın albaniyalı müdafiəçisinin aktivində 223 matç var.

Qeyd edək ki, ilk 10 sırada yer alanlardan yalnız Maksim Medvedev indi də eyni komandanın şərəfini qoruduğundan nəticəsini daha da artıra bilər. O, Rəşad Sadıqovun karyerasını bitirməsindən sonra komandanın kapitanı olub.