FED-dən son 10 ildə ilk - Mühüm qərar manata necə təsir edəcək?

11:00 01-08-2019 480

ABŞ-ın Federal Ehtiyatlar Sistemi (FED) 10 il ərzində ilk dəfə olaraq baza faiz dərəcəsini 25 bənd azaldaraq illik 2-2,25% səviyyəsinə endirib.

HerGun.Az bu qərarın Azərbaycan manatına necə təsir edəcəyini öyrənmək üçün iqtisadçı Vüqar Bayramova müraciət edib.

Ekspert bildirib ki, ilin sonunda dollara proqnozlaşdırılan tələb artımı fonunda manatın məzənnəsi neftin dünya bazar qiymətindən və qeyri-neft ixracı üzrə əsas tərəfdaşlarımızdakı milli valyutaların məzənnəsindən də asılı olacaq:

“FED-in son qərarına rəğmən dollar həm Avropa, həm də əsas aparıcı Asiya valyutalarına nisbətən möhkəmlənib. Əvvəlla, investorlar 50 bənd azalmanın olacağını gözləsələr də, FED 25 bəndlə kifayətləndi. Federal Ehtiyatlar Sisteminin qərarı elan edilən zaman yayılan açıqlama valyuta bazarına birbaşa təsir göstərdi. Belə ki, FED yeni azalmaların gündəmdə olmadığını bəyan edib.

Eyni zamanda, bir sıra Mərkəz bankların, o cümlədən Avropa Mərkəzi Bankının yeni uçot dərəcəsinin azalacağı ilə bağlı bəyanatı da bazara təsir etməkdədir. FED-in qərarından sonra avro 1.10 dollaradək ucuzlaşıb. Bunun digər səbəbi isə Avropa Mərkəzi Bankının növbəti ayın 12-də ehtimal olunan faiz dərəcələrinin azalması ilə bağlıdır”.

V.Bayramov qeyd edib ki, dolların ucuzlaşması nə qlobal, nə də regional gündəmdədir:

“Ağ Evin təsir və təzyiqləri ilə reallaşan 25 bəndlik azalma da ABŞ valyutasını ucuzlaşdırmadı. Bu isə ondan xəbər verir ki, yığım vasitəsi kimi dollar yenə də ən az riskli valyuta hesab olunur. Milli valyutamıza gəldikdə isə, indiki məzənnənin qorunub saxlanmasında Mərkəzi Bankın mövcud müdaxiləsi yenə də həlledici olaraq qalır. Bununla belə, Mərkəzi Bank ilin sonuna doğru yeni ssenarilərə hazır olmalıdır”.

Sevinc Yasinqızı