Ailəsinə vaxt ayıra bilmədiyini demişdi, indi Filippində çıxış edəcək - ŞƏRH

12:05 17-01-2019 8

Azərbaycan millisinin sabiq voleybolçusu Kseniya Poznyak (Koçyiğit) karyerasını bərpa edib.

HerGun.Az xəbər verir ki, Filippin Super Liqasının “Cenerika Ayala Layfseyvers” klubu 32 yaşlı orta sahə blokçusunu transfer edib.

O, növbəti üç ayı bu klubda keçirəcək.

Yanvarın 23-də Azərbaycanın qadınlardan ibarət millisi İstanbulda keçiriləcək püşkatmada Macarıstan, Polşa, Slovakiya və Türkiyənin birgə təşkilatçılığı ilə baş tutacaq Avropa çempionatındakı rəqiblərini biləcək. Bəs görəsən, qitə çempionatının final mərhələsi üçün təcrübəli belaruslu legionerimizin yığmaya qayıtması mümkündürmü?

Bu məsələ ilə bağlı Voleybol Federasiyasının baş koordinatoru Zöhrab Gözəlbəyli ilə əlaqə saxladıq. Onun fikirlərini təqdim edirik:

“23 avqust-8 sentyabr tarixlərində keçiriləcək Avropa çempionatından əvvəl qadın millimiz Avropa Liqasında – Qızıl Liqada mübarizə aparacaq. Mayın 25-dən iyunun 15-dək keçiriləcək görüşlərdə yığmamız C qrupunda yer alıb. Rəqiblərimiz ötənilki Dördlər Finalının iştirakçısı Finlandiya, eləcə də, İspaniya və Belarusdur. 

Yəni yığmamız ilk matçını bir də mayda keçirəcək. Ona görə də indidən demək olmaz. Bizim üçün onun karyerasını bərpa etməsi gözlənilməz oldu. Çünki Yaponiyadakı dünya çempionatından əvvəl – avqustda ailəsinə vaxt ayıra bilməməyini əsas tutaraq karyerasını bitirdiyini açıqlamışdı. İndi isə o qədər də yaxşı olmayan Filippin çempionatında və uzaq ölkədə çıxış edəcək. 

Faiq Qarayevin bir sözü var: “Millidə oynamaq şərəf məsələsidir. Heç kimi zorla millidə saxlamaq olmaz”. Oynamaq istəmədi, özü bilər. Amma fiziki durumu yaxşı olarsa və özü də oynamaq istərsə, yəqin ki, məşqçilər heyəti bu haqda düşünər. Amma onu da deyim ki, o, üçüncü zona oyunçusudur. Həmin zonada Olena Həsənova ondan gənc olsa da, daha yaxşı çıxış edir”.

Qeyd edək ki, Kseniya Poznyak “Azərreyl” (2008/2009), “Lokomotiv” (2009/10) və “Azəryol”da (2014/2015) çıxış etdiyi vaxt üç dəfə Azərbaycan Super Liqasının ən yaxşı blokçusu seçilib. “Azərreyl”lə altı ölkə çempionluğu yaşamış Kseniya İtaliyanın “Parma”, Türkiyənin “Beşiktaş” və Rusiyanın “Leninqradka” komandalarında çıxış edib.

Səbuhi MUSAYEV

ANDROID əməliyyat sistemli smartfonlar

iOS əməliyyat sistemli smartfonlar