Maksim Musayev: “ Bəzi lal, kar, villapərəst, oğru deputatların yanında özümü görə bilmərəm”

10:04 15-03-2019 36
Hazırda ölkə gündəminin əsas mövzusu imzalanacaq əfv sərəncamıdır. Bu əfvlə çoxsaylı siyasi məhbusların, o cümlədən, 14 ilə yaxındır həbs həyatı yaşayan sabiq səhiyyə naziri Əli İnsanovun azadlığa buraxılacağı gözlənilir. 
 
Xızının keçmiş icra başçısı, sabiq deputat, YAP-ın qurucularından sayılan Maksim Musayevlə həm sabiq nazirin azadlığı, həm də digər aktual məsələləri dəyərləndirdik.
 
- Maksim bəy, əfv sərəncamı ilə azadlığa buraxılacaq məhbuslar arasında keçmiş silahdaşınız Əli İnsanovun da olacağı deyilir. Bu xəbərlər barədə nə deyə bilərsiz?
 
- Birmənalı şəkildə onun  azad olunmasının tərəfdarıyam. Xalq arasında Əli İnsanovun həbsdə saxlanılmasına yaxşı baxmırlar. Onunla birlikdə deputat olmuşuq, YAP-ın yaradılmasında iştirak etmişik, Heydər Əliyevin hakimiyyətə gəlməsi üçün biz də mübarizə aparmışıq. Onun nəinki Heydər Əliyevin hakimiyyətə gəlməsində, Azərbaycanda normal dövlət qurulmasında böyük rolu olub. Üstəlik, o, elə nazirlərdən idi ki, ən ağır günlərdə İrəvana getdi. Qayıdandan sonra səfərin necə olduğunu soruşdum. Danışığından məlum oldu ki, orada dəyanətlilik göstərib. Eyni zamanda uşaq vaxtı gəzdiyi İrəvan küçələrindən kədərlə danışdı. Onun parlamentdə deputat kimi yaxşı çıxışları olurdu. Nazir olduğu illərdə səhiyyəmizdə müəyyən dəyişikliklər də oldu. Özü də bu dəyişikliklər büdcəmizin ən kasıb olduğu illərə təsadüf edirdi. Martın 22-də onun doğum günüdür, 73 yaşı tamam olacaq. Mənə elə gəlir ki, cənab prezident bütün bunları nəzərə alaraq onun adını əfv siyahısına salsa, hamı razı qalar. Əli İnsanov iki qardaşının yasına belə gələ bilməyib. Artıq 14 ilə yaxındır ki, həbsdədir. Həbsdə olmaq istənilən halda öz sözünü deyir. Onun yaşı elə həddədir ki, azad olunma vaxtı çoxdan çatıb. Kiçik qardaşı Əhmədin hüzründə iştirak etdim və gördüm ki, İnsanova qarşı nə qədər böyük münasibət var. Minlərlə insan başsağlığına gəlmişdi. Bu çox şeyi deyir. Bəlkə də Azərbaycan həbsxanasında onun yaşda məhbus yoxdur. Alim kimi də güclü idi. Azad Mirzəcanzadə deyirdi ki, Əli İnsanov kimi alimlər ölkəmizdə azdır. İnanıram ki, Əli İnsanovu azadlığa buraxacaqlar.
 
- Siz də yəqin müşahidə edirsiniz ki, ölkə müxalifətinin bir qismi sabiq səhiyyə nazirinə bir ümid yeri kimi baxır, onun üzərində bir lider imici formalaşdırır. Bəlkə də bu səbəbdən Əli İnsanov hələ də həbsdədir?
 
- Əli İnsanov olduqca müstəqil fikirli adamdır. Düşünürəm ki, müxalifət bu işdə düzgün mövqe tutmur. Tutaq ki, İnsanov azad olundu, sonra nə edəcək? Onu tanıdığım qədəri ilə deyə bilərəm ki, Heydər Əliyevə necə sədaqətli idisə, bu şəkildə də davam edəcək. Onu tanıyan biri kimi onun müxalifətə qoşulacağına qətiyyən inanmıram. İnsanovu kənardan kimsə nəyəsə yönəldə bilməz. Digər tərəfdən, o, həbsxanadan çıxan kimə niyə   müxalifətə qoşulsun ki? Müxalifət sözsüz ki, ətrafını gücləndirmək istəyir. Amma İnsanovun o düşərgədə olacağını qətiyyən düşünmürəm. Əgər onun ətrafına kimlərsə yığılacaqsa, bunlar keçmiş YAP-çılar olacaq. Bu da səbəbsiz deyil. Ölkədə elə məmurlar var ki, daxildə narazılıq yaradıb, müxalifəti iqtidarın üzərinə gətirirlər. Bu məmurlar talançılıq, oğurluq edir, rüşvət alır, vətəndaşları qəbul etmirlər. Müxalifət də bunu görüb deyir. Bu məmurlar prezidentə köməklik göstərmək üçün bu cür işlərlə məşğul olmasalar, belə hallar baş verməz. Vaxtilə biz vəzifədə olanda rüşvət almadıq və indi də yaşayırıq. Fakt odur ki, xalqı narazı salan iqtidarda olanlardır. Təsəvvür edin ki, Prezident Administrasiyasında elələri var ki, 20-25 ildir orada otururlar, hələ bir rayona belə getməyiblər. Necə olur ki, cənab prezident ayda 2-3 dəfə ayrı-ayrı rayonlara səfər edir, amma bunlar yerlərində otururlar. Konkret  ad da çəkərəm, sadəcə, ağzıma heyfim gəlir. Belə çıxışlarım olan kimi ya maşınımı əzirlər, ya da Xızının icra başçısı gedib hasarımı sökdürür.  Bəzən də olur ki, işıqlarımı söndürtdürür, suyumu kəsdirir.
 
“Prezident nə üçün ərizələri özü yığmalıdır? O rayonlarda YAP sədrləri, müavinləri yoxdurmu? Hərəsinin  altında 4-5 maşını var”
 
- Dediniz ki, vəzifədə olanda rüşvət almamısınız, amma indi normal yaşayırsız...
 
- Bir fakt deyim. Kazanda yaşayan Hacı Elman adlı birisi gətirib stolumun üstünə 1 milyon dollar qoydu. Ömrümdə dolları nə çamadanda, nə də o qədər görmüşdüm. Məndən torpaq istəyirdi.
 
Rüşvətə hər zaman nifrət bəsləmişəm. İndi normal yaşayıram, övladlarımı da normal şəkildə böyütmüşəm. Bir milyon dolları götürməməyimlə bağlı arxamca danışırlar ki, bunun başı xarab olub, əlində bu qədər imkanları varkən istifadə etməyib. Bir adam tapıla bilməz ki, mənə rüşvət verdiyini desin. Heç kəs yalandan üzümə dura bilməz. Amma bunlar kreslonu qamarlayan kimi əndazəni aşırlar. Papaqlarını ortalığa qoyub rüşvət tələb edən məmurlar utansın. Hər kəs onu da görür ki, murdar yollarla yığdıqları pulları belə yeyə bilmirlər. Allah onları cəzalandırır.
 
- Prezident İlham Əliyev xalq arasında rəğbətlə qarşılanan bir-birinin ardınca sərəncamlar verir. Bunları necə dəyərləndirirsiz?
 
- Ölkə başçısı ilə beş il bir parlamentdə təmsil olunmuşuq. Onun bacarığına, milli ruhuna bələdəm. Amma məmurlar, YAP-ın daxilindəki problemlər görülən müsbət işlərə ciddi mane olur. Təsəvvür edin ki, məni 18 ildir YAP-ın tədbirlərinə dəvət etmirlər. Bilirlər ki, sərt danışacam. YAP indi dövlət, xalq üçün çalışmayan bir quruma çevrilib. Kommunist Partiyasının 70 il ərzində Azərbaycanda üzvləri 400 mini keçməyib. Onun da 50 mini üzvlüyə namizəd idi. Bunlar deyirlər ki, 700 min üzvümüz var. Əgər bu qədərsinizsə, ölkədə ciddi problemlər varkən niyə səsiniz çıxmır? İşiniz gop etməkdir? Prezident nə üçün ərizələri özü yığmalıdır? O rayonlarda YAP sədrləri, müavinləri yoxdurmu? Hərəsinin  altında 4-5 maşını var.
 
- Bu il parlament seçkilərinin olacağı yönündə xəbərlər dolaşır. Əgər bu olarsa, iştirak edəcəksiniz?
 
- Qətiyyən. Bəzi lal, kar, villapərəst, oğru deputatların yanında özümü görə bilmərəm. Deputat ki, xalqın içərisində olmadı, gedib onun dərdini öyrənmədi, qanun hazırlayıb vermədi, o nəyin deputatıdır? Bu səbəblərdən özümü parlamentdə görmürəm. Milli Məclisi gözdən salan deputatlardır. Bunu ümumi şəkildə hamısına şamil etmirəm. Orada sözünü deyən savadlı deputatlar da var. Parlament haqqında kitab yazıram. Spikeri də, ayrı-ayrı deputatları da təhlil edirəm. 
 
- Mitinq müraciətlərinə son aylarda birmənalı rədd cavabı verilir. “Qarabağa azadlıq” şüarı ilə aksiya keçirmək istəyən Qarabağ Komitəsinə icazə verilməməsi daha çox müzakirələr doğurub. Sizcə, mitinqlərə nə üçün icazə verilmir?
 
- Bütün mitinqlərə icazə verilməlidir. Kimin içərisində nə varsa, onu meydana çıxıb boşaltmalıdır. Müxalifətin arxasınca gedən 5-10 min insan bir azdan getməyəcək. Çünki bir sıra problemlər getdikcə həll olunur. Bu problemlər isə ona görə indiyə qədər həll olunmayıb ki, YAP passivdir. Ayda azından iki dəfə prezidentə məlumat verilməlidir ki, filan sahədə hansı problemlər var. Cənab prezident nəyi necə etməyi yaxşı bilir. Qarabağ şüarı altında planlaşdırılan mitinqlərə niyə də icazə verilməsin? Mən mitinq tərəfdarıyam, aksiyaları qadağan etmək düzgün deyil. Bu, demokratiyanın əleyhinə getmək deməkdir. Tənqiddən adam qorxmamalıdır. Tənqid olan yerdə iş yaxşı gedir. Vəzifə başında oturanların çoxu heç mitinqin nə olduğunu anlamırlar. Vəzifə maşınında gedib-gəlməklə iş bitmir ki. Onlar xalqdan ayrılıblar. Müxalifətin mitinqinə icazə verilməyəndə guya onlar danışmırlar ki? Sosial şəbəkələrdə kim nə istəyirsə, onu danışır. Tənqid zamanı elə bir məsələ üzə çıxa bilər ki, dövlətçiliyimiz, iqtisadiyyatımız üçün xeyirli olar. Məmurların fəaliyyətsizliyi ucbatından işlərin çoxu prezidentin üzərinə düşüb.(musavat.com)