Kənd təsərrüfatı texnikası və damazlıq heyvanların lizinq və satışı ilə məşğul olan “Prior Leasing” şirkəti Quba, Qusar, Xaçmaz, Cəlilabad, Masallı və Lənkəran rayonlarında yaşayan fermerlərə səyyar satış xidməti göstərib. 

İki həftə ərzində 60 kənddə olan şirkətin nümayəndələri 550-dən çox fermerlə görüşüb, 25-dən artıq təsərrüfatda olub.

“May və iyun aylarında Aqrar Kredit və İnkişaf Agentliyinin rayonlarda keçirdiyi yarmarkalar regionlarda fermerlərin bizi tanımağa böyük ehtiyac duyduqlarını göstərdi. Ona görə də qərara gəldik ki, daimi olaraq, ucqar kəndləri belə əhatə etməklə, özümüz fermerlərin yaşadıqları yerə gedək.

Kəndlərdə fermerlərlə görüş zamanı onları həm yeni qaydalar, həm də şirkətimiz barədə məlumatlandıraq. “Prior Leasing” belə addım atan ilk şirkətdir”, – bunu şirkətin direktoru Azər Hümbətov bildirib. 

Fermerlərin hansı texnikalara ehtiyac duyduqları ilə maraqlanan şirkət nümayəndələri texnikalarını təqdim etdikləri bütün təchizatçının təklifləri barədə məlumat veriblər. Kiçikhəcmli texnikalar, damazlıq heyvanlar barədə kataloqlar,  məlumat vərəqələri paylanılıb. Xüsusi təchiz olunmuş mobil ofislə səfər edən “Prior Leasing” nümayəndələri fermerlərə maraqlandıqları texnikaların fəaliyyətini videoçarxlar vasitəsilə nümayiş etdiriblər. 

Fermerlər üçün texnika lizinqini asanlaşdırmaq məqsədilə şirkət nümayəndələri müraciətləri yerində qəbul ediblər. Mobil ofisdə yaradılmış şərait şirkət nümayəndələrinə müştəriləri yerində təhlil etmək imkanı verib. Dərhal təsərrüfatlara səfərlər və yerində rəsmiləşdirmə prosedurları həyata keçirilməklə, 80-dən artıq texnikanın satışı ilə bağlı sifarişlər qəbul edilib. 

Qeyd edək ki, “Kənd təsərrüfatına dövlət dəstəyinin və aqrar sahədə lizinq fəaliyyətinin təkmilləşdirilməsi haqqında” Azərbaycan Respublikası Prezidentinin 19 dekabr 2018-ci il tarixli Fərmanından sonra kənd təsərrüfatı texnikası təqdim edən bütün təchizatçılar öz məhsullarını fermerlərə 40 faiz dövlət güzəşti və beş ilədək müddətdə faizsiz kreditlə təqdim edə bilirlər.

Daha əvvəl yalnız dövlətə məxsus “Aqrolizinq” ASC bu səlahiyyətə malik idi. “Prior Leasing” ASC fermerlərə texnikanın güzəştli şərtlərlə satışını Aqrar Kredit və İnkişaf Agentliyinin vəsaiti ilə müvəkkil kredit təşkilatı olaraq həyata keçirilir. 

“İlk təcrübəmizi qiymətləndirərək, “Prior Leasing” mobil ofisin daimi əsasda fəaliyyət göstərməsini qərara alıb. Əgər əvvəllər fermerlərin texnikanı lizinqlə öz rayonlarını tərk etmədən əldə etməsinə çalışırdıqsa, artıq indi onlar buna öz evlərini tərk etmədən nail ola biləcəklər”, - Azər Hümbətov deyib.

“Prior Leasing” ASC 2014-cü ildə təsis edilib. Əsas fəaliyyət növü damazlıq heyvan, kənd təsərrüfatı və tikinti texnikasının lizinqidir. Yerli fiziki şəxslər tərəfindən təsis edilmiş “Prior Leasing” Azərbaycanın bütün bölgələrində fermer və sahibkarla texnika satışı, lizinq və məsləhət xidməti göstərir.