Bu azərbaycanlı gənclər tarixlə elektron musiqini birləşdirib - “Solong” necə yarandı?

10:09 16-05-2019 8

“Solong” - Azərbaycanda modern musiqi janrı ilə məşğul olan musiqiçi qrup və DJ-lərin Azərbaycanın tarixi-memarlıq abidələrində canlı çıxışlarını həyata keçirən musiqi platformasıdır.

Layihəni həyata keçirməkdə məqsəd Azərbaycanda elektron musiqinin inkişafı, həmçinin, Azərbaycanın məkanlarını və tarixini tanıtmaqdır.

HerGun.Az-ın bugünkü müsahibləri layihənin üzvləri, istedadlı gənclər - layihənin PR və marketinq direktoru Şahnaz Əhmədova, layihənin rəhbəri Sahil Umud, səs rejissoru Həsən Ağayevdir.

Cəsarət edib, yeni nəyəsə sıfırdan başlamağı hər kəs bacarmır. Bu layihə Azərbaycanda ilkdir.

Şahnaz Əhmədova layihənin məqsədini belə izah edir:

“Azərbaycanda DJ musiqisi çox məşhur deyil. Amma musiqinin həmin növünə maraq göstərənləri bir yerə yığsaq, saylarının az olmadığını görərik. Onları bir yerə yığıb, saylarını bir az da artırmaq, yeni DJ-lər, yeni istedadlar kəşf etmək üçün bu layihə həyata keçirilir. Tarixi ərazilərdə olması həm də diqqət cəlb etmək üçündür, o məkanlar Azərbaycan və dünya üçün xüsusi yerlərdir.

Layihəmizdəki yerlərin çoxu “UNESCO”nun milli-mədəni irsinə daxildir. Bunu həm də beynəlxalq layihə kimi düşünmüşük. Tarixi abidələrin musiqimizin fonunda görünməsi bizim üçün zövqdür”.

Müsahibimiz zövqlərə tolerant yanaşdığını deyir:

“Zövqlər müzakirə olunmur, qınamamağa çalışırıq. Biz bəyənmədiyimiz musiqiyə bayağı demirik, fərqli növ deyirik. Hər kəs sevdiyi musiqini, sevdiyi incəsənət növünü izləməkdə, dinləməkdə sərbəstdir.

Bütün musiqilərin əsasında klassika dayanır. Rok musiqini sevsək də, filarmoniyaya konsertlərə tez tez gedirik, “Qara Qarayev” adına orkestri dinləyirik.

Layihəyə gəldikdə isə, səs gətirəcəyini bilirdik, çünki işdə əmək var, peşəkarlar işləyir, ortaya keyfiyyətli iş qoyulub. Gözlədiyimizdən də yaxşı oldu. Musiqi cəmiyyətində buna ehtiyac var imiş. Pop Azərbaycanda məşhurdur, məşhur cazmenlər var, klassik musiqi məlum məsələdir. Amma bu cür layihələr azdır. Cəsarət edib yeni nəyəsə sıfırdan başlamağı hər kəs bacarmır. Bu, Azərbaycanda ilkdir”.

Ş.Əhmədova gənclərə dəstəyə həmişə açıq olduqlarını qeyd edib:

“Solong” olaraq gənclərə dəstək vermək istəyirik. Bunun Azərbaycanda tədrisi yoxdur, işin mətbəxini təkcə öyrətmək yox, kimlərlərsə ortaq iş ortaya çıxarmağa da hazırıq, müraciət edənləri dinləyirik.

Yeni səslər, yeni insanlar, yeni dəst-xətlər kəşf etmək üçün yeni DJ-lər tapırıq. İstər məşhur, istər qeyri-məşhur. Yaradıcı gənclərin müraciətlərinə açığıq, çəkinməsinlər”.

Gənclər gələcəkdə işləri böyütmək, yeni layihələr həyata keçirmək, beynəlxalq arenaya çıxmağı planlaşdırırlar.

“Solong” qısa müddətli layihə olmayacaq”

“İşləyirik, işdən sonrakı bütün vaxtımızı bura həsr edirik. Ümid edirik, Azərbaycanda bu tip layihələr çoxalacaq və məktəblər artacaq ki, istedadlı gənclərin kəşfi problem olmasın.

Planlı işləyirik, konkret saatlarda görüşürük. Heç kim işi təxirə salmır, bəzi nələrisə güzəştə gedirik, həftəsonlarımızı həsr edirik.

Həm musiqi sahəsinə, həm də gənclərə fayda vermək istəyirik. İstedadlı gənclər görürük, inkişaflarına yön vermək, kömək etmək lazım olur. 

Bu, xaricdə inkişaf etmiş layihədir. Dinləyicilər yeniliyi yadırğamırlar”. 

Bu, bizim hobbimiz olsa da, artıq hobbi kimi baxa bilmirik.

2014-2015-ci illərdən elektronika sahəsinə üz tutan, 2009-cu ildən ritm-gitarist olaraq bir neçə qrupda çıxış edən Sahil Umudov deyir ki, layihəni yaratmaq barədə iki il düşünüb:

“Layihəni iki ildir düşünürəm, komanda yox idi. Dostlarımızla fikirlər müzakirə olunandan sonra başladıq. Layihə həm də Avropada var, bizdə də olsun deyə, gənclərimiz onlara yox, bizə baxsınlar və iştirak etsinlər deyə yarandı”.

S.Umudov sevdiyi musiqi janrı ilə bağlı bunları deyib:

“Musiqi ilə məşğul olan, əmək sərf olunan bütün işləri sevirəm. Hər cür janra qulaq asıram. Sevda Ələkbərzadəyə uşaqlıqdan qulaq asıram”.

Müsahibimiz elektron musiqi yayılmasa da, həvəskarlarının olduğunu və saylarının artdığını deyir. Azərbaycanda yayılan keyfiyyətsiz ifaların səbəbini isə “10 manatlıq” studiyalarda görür:

“Amma “underground” (yeraltı) tərzdə adını saymaqla bitməyəcək qədər çox sayda gənclərimiz var. Azərbaycan istedadlar ölkəsidir. Biz də onlardan biriyik.

Layihənin uğurlu olmasının səbəblərindən biri gənclərdə vətənpərvərlik hissinin olmasıdır, tarixlərini elektron musiqinin sədaları altında görəndə reaksiyalarını gizlətmirlər. Çağırdığımız qonaqların peşəkarlığı da layihənin uğurlu olmağında rol oynadı. Bakının elit klublarında çıxış edən, sözünü demiş DJ-lər - Teymur Səfərov (Estgamin), Kamil Estenin ifaları buna təsir göstərdi”. 

Qulaqlar köhnəliklərə öyrəşib, yeni format göstərmək istəyirik.

Klassik musiqi sevən, DJ kimi fəaliyyət göstərən Həsən Ağayev (DJ Vebo) illərdir musiqi ilə peşəkar formada məşğul olur:

“1997-ci ildən musiqi sahəsindəyəm. Bəstəkarlıq üzrə 5 il oxumuşam, 5 il vokal dərsləri, 7 il musiqi dərsləri almışam.

Elektron musiqi deyəndə çox insan ağır musiqi düşünür. Amma elektron musiqi kompüter, proqramlarla yığılan musiqidir.

Məqsədimiz köhnə Azərbaycan musiqisini yeni musiqi ilə ayaqlaşdırıb gənclərimizə təqdim etməkdir. Gənclərimiz indi daha da dinamikdir və dinamikanı sevirlər, folk musiqilərimiz sakit olduqlarına görə sakit musiqiləri dinamik tərzdə təqdim etməyə çalırıq. Həm də istedadlı DJ-lərimizi dünyaya təqdim etmək istəyirik”.

Müsahibimiz bayağı musiqi anlayışının düzgün olmadığını bildirir:

“Bayağı musiqi yoxdur. İşə məsuliyyətsiz yanaşırlar və savadsız ifa musiqinin bayağı adlanmasına səbəb olur. 

“Vətən laylası” adlı layihəmizin üzərində işləyirik. Uşaqlıqdan bəri dinlədiyimiz, böyüdüyümüz mahnıları gələcək nəslə xatırlatmaq üçün yeni formada təqdim etmək istəyirik. Birinci versiyası verilib, ikinci versiyasını hazırlayırıq, hər janrda olacaq. Birinci proyekt uğurlu alındı, bəyənməyən olmadı, demək olar. İkincinin daha da uğurlu alınacağını gözləyirik.

“Solong”a ayaq basdığım gündən buradan getmək fikrim olmayıb. Cəmiyyətə, gənclərə faydamız dəyir. İncəsənət sahəsi elədir ki, yuxumuza haram qatsaq da, işi görürük, görməliyik”.

Nəzrin Həsənova