Həkim COVID-19-un saç tökülməsinə təsirlərindən danışıb

04:00 18-11-2020 14

Koronavirus baş dərisində və üzdə tüklərin tökülməsinə səbəb ola bilər.

Həkim-trixoloq Georgi Abramov “Sputnik”ə verdiyi müsahibədə bunun niyə baş verdiyini və bu problemin öhdəsindən gəlməyin yollarını göstərib.

Mütəxəssis qeyd edib ki, koronavirusun insan orqanizminə təsiri hələ tam öyrənilməyib və çox güman ki, o, birbaşa olmasa da, dolayı yolla saç tökülməsinə gətirib çıxara bilər.  

“Bu gün keçəlliyin tamamilə otoimmun bir proses olduğu, yəni immunitet sisteminin insanın saçlarına hücum etdiyi 100% sübut edilib. Çox vaxt bu proses stresdən qaynaqlanır. Stresdən danışarkən, işdə rəhbərliklə yaşadığımız problemi stress adlandırmaq doğru deyil. Bu, adi və normal həyatdır. Stressin çərçivələri çox genişdir. Təəssüf ki, pandemiya bəzi insanlara çox mənfi təsir edir”, - deyə həkim bildirib.

Eyni zamanda G.Abramov söyləyib ki, vaxtında həkimə müraciət olunsa, koronavirus səbəbindən saç tökülməsini dayandırmaq mümkündür.

“İmmunitet qalxanabənzər vəziyə, oynaqlarımıza, saçlarımıza və bir çox orqanımıza hücum edir. Saç tökülməsinin narahatedici olmadığını demək, mahiyyətdən bixəbər olmaqdır. Bu məqam həyəcana səbəb olmalıdır. Əgər kişinin üzündə və başında tükləri tökülürsə, yalnız dermatoloq və trixoloqa deyil, həm də immunoloqa müraciət etmək lazımdır”, - deyə G.Abramov qeyd edib.